بالمرصاد نيوز أضواء على أهم الأنباء
مقالات مشابهة
بقلم عز الدين الدخيلي
مكتب تونس موقع جريجة بالمرصاد نيوز
بقلم : عزالدين الدخيلي… وجهة نظر حول زراعة الشعر وتركيب الشفر وتلصيق الظفر … عند الانثى وعند الذكر … نعرف إللي كل واحد في تصرفاته حر ، وكيما يقول المثل اللي هاز قربة منقوبة تشرشرلو على الظهر لكن كي تبدا حاجات ما عندها حتى منطق و حتى مبتدا ولا حتى خبر … ماذا بينا نلفتولها النظر … وفي هذا الصدد عندي سؤال للراجل إللي مكهب على 50 أو 60 و هو أصلع بقضاء الله والقدر … عندو 20 أو 30 سنة فرطاس وفجأة تطلعلوا النعرة في طاسة مخو ويمشي يصرف الملاين باش يزرع الشعر!!! ، آش تقصد بالضبط يا سي الذكر !!!!؟؟؟ ، ماهو على الأقل كي أنت مستعار وحاشم بصلعتك ،إلبس “باروكة” كي تبدا مع الناس ونحيها كي تكون وحدك ” ويا دار ما دخلك شر.”
… ونفس السؤال مطروح لهاك العزوزة الترنكوشة إللي عمرها 69 والزمان حالل شانطي (3D) في جلود وجهها وشلافيطها تدلدل وتلك سنة الله في البشر ، ورغم ذلك تمشي للحانوت متاع التجميل بمعدل مرتين في الشهر … تركب ظوااااااافر طوال جداااا تلصقهم على صوابعها ب super glue ويبدا لونهم يا صفر يا خضر … وتركب شوااااافر طوال جداااااا تحت بقايا حاجبيها اللتين عوضتهما بأخريين مرسومتين على جبهتها بالحبر الأسود الصيني الداكن (encre de chine) ، ياخي ثمة نوع متاع دهن ينبت الشعر … راهو ما ثماش خير من خليقة ربي يا خلق ربي … يا بشر …!!؟؟ . وعلى كل حال ما يتغشش مني حتى حد ، حبيت فقط نعطي رأيي في موضوع الجمال الإصطناعي … وأنا حرّ …
