أخبار عاجلة
الرئيسية / مجتمع / “تطلع تهبط ،تنڤز ، مكورن مكورن ياخي أنت تعرف أكثر من المطبوعة” ؟؟؟؟ !!

“تطلع تهبط ،تنڤز ، مكورن مكورن ياخي أنت تعرف أكثر من المطبوعة” ؟؟؟؟ !!

بقلم عزالدين الدخيلي

 

 

مكتب تونس – موقع جريدة بالمرصاد نيوز

كتب عز الدين الدخيلي

 عاد فتكم بالحديث ، مشيت للسبيطاااار متاع الدولة التونسية الله لا يكسرلها محراث (قسم الإستعجالي) باش نعدّي على خاطر مرضت بعد ما خذيت هواء قوي بسبب التغير الفجئي للطقس…. بعد ما سجلت وتعديت على “السيركوي” (circuit) متاع الكوفيد والحمد لله ما عنديش الكورونا دخلت في السيركوي الٱخر متاع الإنتظار ، الحاصيلو صدقوني ڤعدت ساعتين و ربع وأنا نستنى قدام مكتب طبيبة سطاجارة  stagiaire ما نعرفش يا هل ترى المصطلح صحيح أم لا ، سمعتهم يڤولوا هكّابالطبيعة نستنى في دوري على خاطر ثمة قبلي 3 مرضى أكاهو !!!! تنجموا تڤولولي كيفاش تستنى ساعتين وربع و قبلك فقط ثلاثة أشخاص !؟ عندكم حق تسألوني … لكن كي تعرفوا أن “المزمزال ” الطبيبة ربي يسلم قرايتها لاهية بشعرها المتدلي على أكتافها أكثر من لهوتها بالمرضى وحتى كمامة ما هيش لابسة … هاي خرجت هاي دخلت … هاي خرجت هاي دخلت وهي تتختّل في مشيتها و مابين الخرجة والدخلة تڤعد سبعة دراج غايبة !!!! مع العلم ان المريض إللي يدخللها ما تشدش معاه 3 دقائق لكن إللي تعديه خارج المكتب ما يعدي ل “5 ملاين مريض ” … بصراحة طلعلي الدم لراسي وأنا واقف نخزر للشيئ هذا الكل ڤدامي وساكت (ٱش يعمل المريض ڤدام طبيبو)..!!! . يمكن كي شافتني واقف عندي بارشة و peut être حست بيّا نحضر في روحي باش نتقيأ (أكرمكم الله) على قسم الإستعجالي منين هب ودب !!! عملتلي إشارة بيدها ڤالتلي تفضل يا حاج أدخل … ڤلتلها يزيد فضلك “يَخْتِي” ، ٱش خص لو كان يسهلي ربي في حجة خليني ندعي لتونس من البقاع المقدسة ثماش ما يلطف بيها العالي و تخرج من الترتيب والتصنيف “المنتالي” !!! – ٱش عندك ، شنوة يوجع فيك ؟ أنا ما زلت ما ڤلتلها شيئ وهي سألتني: – عندك مرض تداوي عليه؟ لا ، والحمد لله مالا علاش جيت ؟ يا تكتورة ، نهارين وراء بعضهم خرجت من الدار نقضي وأنا لابس لبسة خفيفة و ما قريتش حساب الطقس بارد ، وليت نكُح وعندي البلغم في حلقي وفي صدري ، علما وأني مرضت قبل بالبرونشيت وكل مرة يتحيرلي !!! الحاصيلو ، ومن غير حتى ما عملتلي أي نوع متاع تشخيص سواء بالأسئلة أو بمعاينة أماكن الداء وفي هاته الحالة تڤلك حل فمّك و ڤول ٱاااااه كيما يعملوا أطباء الكورة الأرضية الكل وما جاورها من الكواكب الشقيقة الأخرى ومن غير ما قاستلي ضغط أو الحرارة ومن غير ما خسرت عليا و ڤالتلي برّا اعمل أشعة على صدرك أو تحليل أو أي حاجة تنجم تعرف بيها أصل المرض خصوصا وأن الذي أمامها مسن تجاوز السنين !!! جبدت مطبوعة حاضرة من المطبوعات المرقونة مسبقا المكدسة أمامها فوق المكتب و وضعت عليها الإمضاء قائلة : – هزها للفرملية تطبعها ، استعمل الدواء هذا وإن شاء الله لاباس ؟ لا لا باش ما نكذبش على ربي ، زادت كتبت عليها إسم sirop متاع كحّةعاد حبيت نڤوللكم إللي هاذي أسرع فازيتة عديتها في حياتي ، دامت 50 ثانيةلو كان جيت نعرف هكة ، راني من الباب قلت للفرملية أعطيني هالمطبوعة السحرية و وفرت على روحي 3 سوايع وقت ضايع . وباش ما تڤولوش نكلّخ عليكم ، هاويني السرتفيكة باسمي ، واحتراما لإسم المؤسسة وللأطباء الصحاح والأكفاء، عملتلها من فوڨ ومن لوطة شوية ضبابةوحجّايتنا الحقيقية طابا طابا ، و السنين الجايا تونس تولي صابة … وأرشملو شكبّة يا بابا ..

 

عن badreddine

شاهد أيضاً

وفاة المغفور له بإذن الله  والد اللاعب عبد الرؤف كرومة بنوبة قلبية و هو يتابع ابنه في المباراة على مدرجات القاعة المغطاة بسيدي بوسعيد

      واقعة أليمة جدت ليلة أمس الأربعاء 27 مارس 2024 بالقاعة المغطاة بسيدي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *