أخبار عاجلة
الرئيسية / عالمية / صورة وتعليق بين العقل والعاطفة…

صورة وتعليق بين العقل والعاطفة…

بقلم عزالدين الدخيلي

 

مكتب تونس موقع جريدة بالمرصاد نيوز

متابعة عزالدين الدخيلي

 كل وسائل الإعلام التونسية تتحدث عن مشاركة رئيسة الحكومة نجلاء بودن في المنتدى الإقتصادي العالمي ‘دافوس’ 2023 والعديد منهم “شاخوا” وانتَشَوْا بالصورة الزهوانية” والضحك والعناق الذي جمع بودن برئيسة البنك العالمي وربطوا حميمية الصورة بموضوع القرض الذي تنتظره تونس بلهفة شديدة وروجوا بتحاليل عاطفية عن سعادتهم بإمكانية الحصول على القرض “المحنون” !!! خصوصا وأن رئيسة البنك العالمي عبرت في تدوينة لها على تويتر عن دعمها لتونس …!! لكن أنا كمواطن تونسي عافس عل جمرة القروضات والتداين ، ونعرف شنوة معناها الكريدي والرهنيّة عند الٱخر ونعرف شنوة معناها الصبع تحت “الزرصة” ، لا أنساق وراء التحليل والتفكير العاطفي والإستنتاج من خلال صورة أو تدوينة … أنا كتونسي نحب بلادي ونحب أولادي وأحفادي وكل الأجيال القادمة يعيشوا وماهمش موسالين لحتى حد ما نيش موافق على أي نوع متاع قروضات خارجية مهما كان مصدرها … – ياخي في بالكم إللي كل مولود تونسي جديد يهبط من كرش أمه وجي للدنيا موسال في تقريبا عشرة ملايين …!؟ ياخي كي ضحكتلنا رئيسة البنك العالمي وحملت رئيسة الحكومة التونسية وعبرت عن دعم بلادنا ، مشاكلنا الإقتصادية والإجتماعية باش تتحل !؟ ياخي كي باش نتحصلوا على القرض باش نولوا من أعيان العالم !؟ ياخي الزوز صوردي إللي باش نتحصلوا عليهم من هذا “الغول المستعمر” العالمي باش يردّونا في بحبوحة و نولوا ندزّوا في المشاريع والإستثمارات بالركبة !؟ إحشموا على رواحكم يا توانسة ،مواطنين ومسؤولين ، ونحّوا من روسكم عقلية التواكل واللڤمة الباردة وشجعوا بعضكم على حب العمل والإنتاج ويزّيكم من البكاء والتخرنين والتڤنڤين والتمخيط و حلّوا مشاكلكم بأنفسكم … إكبسوا السنتورة وحبوا بعضكم وعاونوا بعضكم وساعدوا الصادقين والوطنيين في هذا الوطن على تجاوز المحن وحطوا اليد في اليد ضد كل وبش سارق أناني بيّوع يعطل في مصالح البلاد والعباد … رانا كعبتين وكعبة … خوذوا العبرة والتجربة من بلدان أخرى كانت تحت الصفر وشعوبها عملت على إمكانياتها الذاتية و أصبحت قوة اقتصادية واجتماعية ومرجع في حسن التسيير والكفاءة والإنتاج

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *