بالمرصاد نيوز أضواء على أهم الأنباء
مقالات مشابهة
بقلم : عزالدين الدخيلي :
تونس في الخير والخمير والرفاه للعنكوش ، هاو عاد فتكم بالحديث ، اليوم كيما العادة نتطلفح بين صفحات الأخبار ، هالحيط يدزني وهالحيط يردني لين تدعثرت في ورقة مكتوبة من لطرف للطرف ،مليانة بالكتيبة فيها تقريبا 39 سطر ، لو كان تعصر منها الحبار تعبي بيدون بو 5 ليترات !!! الحاصيلو قرار صادر على وزارة التجارة ومصححة فيه وزيرة التجارة ذات نفسها ، كي ثبت نلڤى العنوان “قرار” بتاريخ 8 مارس 2023 ، معناها قرار فرشك سخون ما زال كي خرج من الكوشة … فرحت لين ڤلبي وللّى يردك بالقوي وڤلت بيني وبين روحي ، 100 % الوزارة خممت في المواطنين بمناسبة اقتراب شهر رمضان و باش تعمللهم تخفيض في عديد المواد والمنتوجات الأساسية إللي يكثر عليها الإقبال في هالشهر الفضيل ، بديت نقرا في الديباجة (المقدمة) إللي طولها زوز كلم لين وصلت لجوهر موضوع القرار نلڤى الوزيرة سعرت زوز مواد أساسية لا غنى عنهما عند التوانسة ولو كان المواطنين لا قدر الله ما يشروهمش وما ياكلوهمش ينقرضوا من هالوجود نهائيا نظرا لأنهما زوز غلال حياتية كيفهم كيف الأكسيجين إللي نتنفسو فيه ، وهما : سي التفاح و سي الموز !!! – أما الأول يعني التفاح ، فهو إنتاج محلي ،تونسي حر ، مزروع في أرضنا ، يتغذى بالماء متاعنا ، ويعمل bronzage تحت شمسنا و يتنفس هوانا ، ويكبر في عزنا وحتى جمع الصابة ساعة ساعة يعاوننا فيها ربّي ، كي تكون أفعالنا مريڤلة ، يبعثلها سحاب تبروري أوحجر يحصدها قبل وقتها وهكّاكة ناكلوا التفاح منمّش و مرنڤط !!! وزيد السيدة الوزيرة عملتلنا سوم مناسب الكيلو ب 4.500 … – في ما يخص الموز ، فإنه يجينا من الخارج من بلاد ما وراء المحيطات نستوردوه من عند الڤورّة بالعملة الصعبة (إللي ندزوا فيها بالركبة في الظروف الحالية) وقد سعرته السيدة وزيرة التجارة وتنمية الواردات (عفوا تنمية الصادرات) في قرارها التاريخي الذي نحن بصدده وتم تحديد الكلغ ب 5.000 !!! دينارات ، وكيما يڤول المثل “سرواله مڤطع وفي صبعو خاتم … في الختام عندي سؤال للوزيرة ، – علاش قرارك ما تحدثش على عشرات المواد والمنتوجات الأساسية جدا على مائدة التونسي !!!؟ – ياخي في شهر رمضان التونسي باش يشڨ فطره على بنانا وإلا تفاحة …!!! وإن شاء الله رمضانكم مبارك …
