بالمرصاد نيوز أضواء على أهم الأنباء
مقالات مشابهة
يقلم عزالدين الدخيلي
مكتب تونس – موقع جريدة بالمرصاد نيوز
متابعة عز الدين الدخيلي
حبيت اليوم نحكي على حاجة تهم مستقبل بلادنا ، ماكم تعرفوا إللي التطور والتقدم متاع أي دولة متوقف أساسا على مستوى التربية والتعليم والتكوين متاع أولادها إللي باش يڤودوا السفينة في المستقبل ، وفي هذا الصدد حبيت نبدا بالذرّي الصغار إللي ما زالوا كي فڤّسوا من العضمة وإللي هوما الرّكيزة الأولى لأجيال المستقبل ، وفي الحقيقة كي نشوف الوالدين ٱش يصرفوا وٱش يكتّوا فلوس لأولادهم في الروضة إللي هي أول فضاء خارج فضاء الأسرة يبدأ فيه الطفل يأخذ الفورمة متاع المستقبل في مجال التعليم والتكوين ، وكي نشوف الروضات في كوكب تونس ٱش يطلبوا على الأولياء ، نڤول إللي بلادنا باش تدوبل على اليمين في أوتوروت الدول المتقدمة كيما اليابان !!! وإليكم نبذة عن المصاريف إللي يلزمك تدفعهم كي ينوب عليك ربّي بغشّير وإلا غشّيرة وتحب تدخلهم للروضة : وسعوا بالكم واحسبوا معايا “الطوطال” (total) على خاطر “الكلكيلاتريس”(calculatrice) متاعي غصّت200 د الشهر و ترسيم 80 د وخلص شهر جوان بالمسبق. جيب معاك زوز رامات ورق و 100د أدوات مدرسية جيب معاك 10 رولوات papier toilette جيب 20 papiers mouchoirs حق الطبلية tablier50 د نسيت ماقتلكش – نادي الموسيقى 20د – نادي المسرح 20 د – نادي الرقص 20 – كان تحب نادي الاعلامية 30 د و ماك تعرف عاملين contrat مع طبيب يجي كل جمعة 15 د والرحلات راهم obligatoire كل رحلة ب 50د السحّار زادا يجي مرتين في الشهر 5 د كل مرة وماك تعرف نعملوهم ازياء موحدة في عيد الطفولة وعيد الشجرة و عيد الأمهات في قالب بعضو 100 د للصغير و عصيدة الزقوقو كل صغير يجيب 200غ مكسرات مخلطة وكان ماتراش مانع بربي تنجم تطبعلنا هال 70 ورقة باش يقراو بيهم الصغيرات ماحبيناش نكثرو عليك كيما تعرف خويا أحنا مانحبوش نكثروا على الأولياء نعرفو الدنيا غلات اللطف… في الأخير نطلب من الله المنان ..اللطف من قراية هذا الزمان.
