بالمرصاد نيوز أضواء على أهم الأنباء
مقالات مشابهة
بقلم عز الدين الدخيلي
مكتب تونس – موقع جريدة بالمرصاد نيوز
خواطر عزالدين الدخيلي
عاد فتكم بالحديث ، يحكيو على بلاد من بلدان الكعبورة الأرضية إسمها تونس ، إللي حسب المؤرخين ، المساحة الزمنية متاع حضارتها كي نحسبوها من تالي وأحنا جايين نلڤوها مترامية الأطراف إلى حدود 3500 عام !!! معناها نظريا بلاد متطورة وعندها باع وذراع في التقدم والتدبّر والتسيير، و”نورمالمون” (normalement) عندها مائات السنين مللي تجاوزت مرحلة “صغيّر صغرون ، حب التبرورذ” !!! لكن للأسف كي نشوفوا أمورها على أرض الواقع ، نلڤوها على مراد الله “طويل بلا غلّة” وفي رواية أخرى “دادّاش بالحبّاش” تبدّل في الخطوة في حين أنّ بلدان ٱخرين أصغر منها في العمر ، تولدوا ٱمس في الأيام ، كبروا ونضجوا قبل وقتهم ، تطوّروا وعملوا جوانح وطاروا … لكن كيفاش نعرفوا إللي بلاد أمورها متعبة وحالها يبكي العدو قبل الصديق !؟ الجواب : – كي تدور في شوارعها و انهجتها وتدعثر في حفرها وتشم ريحة فضلاتها المفرتة في كل تركينة ! وضو البلدية يشعل في غرغور الڤايلة ويطفى في نص الليل. – كي تتلاڤي بعبادها وتحكي معاهم ، تحس إللي أكثرهم ما على بالهم بالوضع ، يسرحوا ويروحوا ، فيهم شكون متشائم ، ناقم ، يمشي وهو نايم ، وكي تڤولو شبيك على وجه الأرض هايم ، يتسيب عليك ويسمعك ما “لذ وطاب” من عبارات الحزن والحسرة على الماضي الذي في تقديره أحسن وأنظف من الحاضر !!! والعلم عند ربي إذا كلامو صحيح أم لا …! وللحديث بقية.
